有仔趁嫩生

自從去年結左婚後，以下說話差不多定期會聽到。

「諗住幾時生番個玩下呀？」
「有仔好趁嫩生喇，唔係第時你成頭白髮佢連毛都未出齊！」
「你唔係想你老婆做高齡產婦嘛？」

呢個問題上，我同老婆的諗法一致，覺得完整既家庭生活有下一代係最好。不過大家的出發點有些少唔同。老婆好大程度以生理同心理既角度出發，話年紀越大越危險，而且大家都喜歡小朋友；而我當然係從經濟或者宏觀角度去睇，雖然我唔信養個小朋友要四百粒，不過錢加心力就肯定唔止呢條數，而且屋企夠唔夠住、邊個湊仔及請工人等等都係技術性問題。

老人家經常都話以前一生就生十個八個都得，都養到你地依家肥肥白白，老實講我真係想像唔到果種辛苦法。如果你叫我依家要打三份工做18個鐘養十個八個人，我諗我應該過唔到今年聖誕。

老婆唔係咁諗，佢認為生左出黎先啦，生左就有辦法去養。唔知其他人既老婆係咪個個都係咁諗？定係其實香港太少夫婦想生細路？

我相信現代人對生仔咁顧忌，其中主因就係怕一有細路就會冇左依家既生活水準，即係話你無得一年至少去一次旅行，又冇得放左工就行街shopping，見野就買，更加要花大部份時間為兒女的前途籌算。簡單黎講，就係冇左自己。

呢樣我唔驚，因為知道自己要結婚我就預左冇左自己，一切以老婆行先。不過生仔，係一世投資，我唔知自己能力去到邊。

不過我記得有人同我講「生仔唔係一盤生意或一門投資，你當佢生意咁睇，條數一定冇得賺！你應該當佢係你生命的一部份，無左佢唔得，個諗法就會唔同。」

我... 默然不語