人吃人的社會(二)

今日睇am730，賢仔案被告孔女士被判12年，是多是少也好已成定案，上訴與否由它罷，反正事件終於有個了解。

坊間一向大把噪音話「邊個邊個好明顯係有罪，但係邊個邊個先至係罪魁禍首黎」呢一類自以為看透世情的說話。就法律上而言，個官都判左啦，孔女士罪名成立，其前男友罪名成立，斬人手既兩個細路罪名成立，接載既的士司機罪名成立，但係孔女士既丈夫岑先生，法律上無任何罪名。坊間眼見個個有關人物都有個正路既下場時，呢位無乜下場既岑生，自然有人睇唔過眼，孔女士既父母出於愛女之心自然認為岑生害左個女一世。

一個家庭已經出現如斯慘劇，仲要俾好多香港人抽絲剝繭咁揪晒所有人出黎，寫晒罪狀，十足十答題機器，理性之餘又答得快而準！但係批判過後，璀璨歸於平淡，整件案對自己有冇絲毫既反思？處理感情問題同呢兩公婆係咪差唔多？有冇好似岑生咁講左既野唔算數？有冇好似孔女士連未來奶奶反對結婚都唔理三七廿一？

如果真係驚有朝一日會成為同類案件既主角，係咪依家就要改變一下呢？

如果真係驚有朝一日會成為同類案件主角既父母，係咪依家就要諗點樣灌輸正確價值觀俾子女？

另一邊廂，高琳琳日記又觸動唔少人既神經。有人睇完好感動，有人睇完好衝動，有人睇完好激動。

只有九日生命的琳琳，父母懷孕中期得知胎兒有病，仍決定保留直到出生，在病榻輾轉下離開人世。激動一派自然認為，早知胎兒有病仲生佢出黎咪即係叫佢受苦，語調跟「早知買左個菠蘿開左見到係爛心既就咪鬼食啦」差唔多。當呢個世界有討論到底一個胎兒到第幾週先算係一個「人」既時候，要父母當個胎係菠蘿既難度真係幾高。

我未試過呢種經歷亦唔想有，不過我設身處地諗，撇除醫學、技術問題，我老婆有左個有病既胎兒，首要一定係老婆既安全，個胎既安全，才到醫生其他的建議。說到底，大家都係血肉之軀，有感情，並非除手掉個菠蘿入垃圾桶咁簡單。

我唔知道胎兒出世前或出世後幾耐先會有思想意識，唔知佢會唔會明有人叫自己阿媽落左自己既感受係點；或者第日又會有人同你講「生左你出黎幾廿年，淨係識食、訓同埋駁咀，早知當初落鬼左你」，唔知你又有咩感受。