有線點做生意？！

估唔到一單關於英超聯既新聞會上到港報頭版。NOW寬頻電影嬴左英超聯賽轉播權，獨霸歐洲四大聯賽的有線電影前景進一步被人看扁。

有線電視近年可謂頻頻失利，年前失去了ESPN頻道及歐聯賽事的轉播權，已為有線電視發出警號。今番英超聯賽轉播權之爭，事前NOW早已放出空氣志在必 得，有線高層理應嚴陣以待，但從媒體資料可見NOW嬴得十分輕鬆，相信除了英超聯眼見目標價已到達並不需要再遴選入圍者外，有線本身也許有心而無力也。

眼見賭波合法化後，港人對球賽直播的渴求只會有增無減，況且速度高肢體衝撞多緊張剌激而又有點情意結的英超聯賽更合港人胃口，相信英超聯已一早預見亞洲區 香港轉播權是隻會生金蛋的雞。在商言商，有線怎會不明白英超聯賽轉播權為其中一條公司重要的命脈？有線年內早已有一連串的動作為公司製造充足的資金應付未來，其中一項最明顯的當然是「精簡人手」了。

經營收費電視多年的有線深深體會盲目高價競投外國節目頻道並非良策，於早年除了製作自家綜合性節目，甚至近年涉足電影製作也是冀望為有線殺出一條新血路，務求能夠以此控制經營成本。

有線投資3億元於附屬公司驕陽電影製作公司，成品有Twins阿嬌演出的《犀照》及將會上畫由劉華演出的《墨攻》。有線以銀彈及明星效應希望在電影市場穩佔一席位，除了於港 產片中建立口碑，更重要的是為有線提供一個較穩定的收入及影片來源。不過電影投資的回本期較長，以及外語片帶給港產片的衝擊不比想像中小，有線電視要不斷投資以保持出品高質又叫好叫座的電影，才能本地和外埠銷售保證，為自己增加本錢。

其實有線相對NOW已經有先天不足，就是商住覆蓋率。NOW一直沿用PCCW的電訊網絡，而有線則重新鋪設網絡，覆蓋率當然有所不及，而且鋪設成本不低，所以大部份戶數分散的地方如果沒有足夠的上線客戶亦不會貿然鋪網。不過大屍認為雖然維持網路的成本不低，但卻是與擁有完善網絡的NOW抗衡的一大資產。眾所週知PCCW的電訊網絡一向有租線收入，租價當然可升可跌甚至唔租，有線自設網路可以不用看PCCW面色做人。只要不斷提升網絡質素，加大覆蓋率，成本無可避免提高，但在商家眼中，一個完善網絡是甚具戰略價值的資產，不容低估。況且現在寬頻客戶只約32萬，對比有線電視戶數77萬，更應盡力提升電視客戶選用網絡服務，達至更大經濟效益。

另外，有線成立的新聞速遞不單開拓收入，令播放層面更廣，隨之而來是增加廣告價值提升收入。雖然在九鐵上播放好壞參半，但無可否認這是一個有效的宣傳渠道，如果再進一步滲透到屋苑大堂、會所、甚至是人流高的便利店、報攤等，相信能吸引更多眼球。

股市牛到呢！！

今日恆指已經升到萬九點，幾日來平均成交上升到五百億左右。由6月時約低點15200點到現在的19100點左右，升幅已經有二成半。

單睇成份股兩大火車頭匯控同中移走勢各異。匯控於5個月內升幅只有11%，相反中移已有70%。相信不少股民都會問，中移咁升法可以升到去邊？匯控會唔會追落後？

現時坊間支持中移上升眾說紛紜，自己記憶所及主要有好幾點：第一是人民幣長遠升值的憧憬；第二是預期國內客戶(特別是中西部)不斷增長；第三是國內3G技術開發成為通訊業的突破；第四是零八奧運帶來給中國商場上的機遇，但係歸根究底都只是三個字「中國熱」。

熱潮何時冷卻？誰知道。
有跡可尋嗎？或多或少。

有如物理現象：燒得酌熱火紅的金屬遇上溫水，先是爆發出驚人熱力的水蒸氣，令水也變得沸騰，但隨之而來金屬的火紅沒有了，先前的酌熱也不復見，等水蒸氣消散後一切回復平淡。

中移甚至其他有「中」字背景的股票，何時會遇上這股冷水？現在中移距離歷史高位約80元還差10元左右，我相信股民熱情不減的話，來年甚有機會再攀高峰，屆時股市會像二千年科網潮重臨的萬人空巷。

另方面，為何匯控一 直落後大市？眾所週知有以下因素：第一是多隻大型中資銀號上市，令機構調低銀行股中匯控所佔整體份額；第二是恆指成份股比重調整令匯 控佔恆指比重下降；第三是匯控並非炒股，一手價格接近6萬元，加上港交所調整買賣股份差價，令大笨象更笨。這幾個因素令不少喜愛收集銀行股收高息的股民轉 投中資銀行股以博取更佳回報。

但被股民忽略的匯控一直以來業績驕人，增長及派息穩定，低P/E，這些要素是一眾中資銀行股不及的，以現時約147元的水平，不難更進一步，如果匯控願意拆細成100股一手，相信股價必有一番新景象。如想更清楚匯控投資價值的話一定要問問市場先生。



**************************************
免責聲名：以上內容關於任何投資市場資訊及意見只是個人經驗分享，並非投資建議。

開扑(三)

開扑三日，開始去諗究竟以後我可以寫乜野入呢個扑呢？

「最簡單就梗係將自己既生活好似真人騷咁用文字寫出黎啦」
之不過我個個禮拜都係返工放工返歸食飯訓覺，換言之，我咪即係日日Copy & Paste就攪掂？

「OK，你寫得detail少少咪得囉，譬如「今日食晏果碟飯好難食下又多油仲要好?下添」」
老老實實有邊日出去食既飯唔係咁先得架，你唔係以為某大快餐店果D飯真係同Poster果D一樣卦。而且淨係咁樣寫法，我諗不出3年我寫既字數真係多過倪匡咁多本小說。

「咁一係寫你既工作經歷或者體驗啦」
呢D野唔係應該寫入Resume度咩？我只不過係一條打份牛工既契弟遮，又唔係好似CK兄或者渣估兄咁做老細，要寫既一開波就梗係鬧阿頭架啦仲會有第二瓣？

「大佬呀，咁你想Up咩咪寫咩野囉，家下差人拉牙？」
雖然話呢個扑係我渣旗，之但係我笨唔能夠是但丟低一句「X！！！！！」咁就呃篇文嘛，我似D咁Cheap既人咩！

「咁你諗唔到寫乜果日咪唔寫囉！」
你知唔知咩野叫做扑呀，係Weblog，即係要黎Log野架嘛，邊有可能成日流流長都冇野Log？咁同死Server有咩分別？咁樣實俾D客插死啦。

「你何來有客呀又？」
..
....
......

放鬆D啦香港人。

開扑(二)

但凡每個人去做一樣新鮮既事，開頭三幾日都有無比衝勁去做，立下宏願斬雞頭燒紅紙，氣勢真係一時無兩，之不過呢種情況最後要衰收尾拍拍蘿友唔玩，俗語稱之謂「新屎坑三日香」。

呢個世界亦都一千幾百萬人會話成功非僥倖，終極都係要埋頭苦幹愚公移山咁，先至會望見他朝成功既一日。我唔係唔buy呢個concept，只不過「講」同「做」一向都係兩回事黎。

老實講，我攪呢個扑真係咁上下情況，試問又有邊個唔係(...o拿，邊個試下話唔係丫，你咪走呀你...)，只不過無衰到收尾既人到底係點樣支持落去？我諗簡單黎講，我估有人真係會將寫扑成為生活的一部份。

我回想起8, 9年前潮流興玩Chatroom玩icq時，我返緊工都依然冇停咁玩。我好享受同唔同生活背景既人溝通，亦因為咁由朝七玩到晚十一，唔玩一日都周身唔舒服。好明顯我係患左「全天候上網症後群」。

不 過寫扑同玩Chatroom玩icq真係唔係幾同，似個得admin有得出post既newsgroup。玩Chatroom玩icq真係是是但但 「喂」、「Hello」或者「^_^」都攪得掂，但係寫扑卻係真真實實咁寫低意見或者感受，個basic requirement真係大出入。唔單止係咁，有人話寫扑好處極多，你話係唔係？我就話徙氣，我夠可以話寫complaint letter好處極多啦，除左可以突顯你係尊貴客戶既身份，又可以令服務供應商得到最直接既業務建議，仲可以提高公司既知名度，令香港於珠三角更具有不可取代既優勢等等... 唔通你日日都寫封俾唔同公司？

多多廢話都係假，即管睇下個扑捱到幾耐！

開扑(一)

依家潮流真係多花臣，我呢D男人老狗到依家個潮都就到水尾先學人開個扑寫下野。鬼咩，平時懶丫嘛！

我都好佩服有D扑客真係好有耐力，話寫話寫就有一千幾百字出街，但係個個都話自己忙到嘔茄，到底佢地邊度bid時間出黎呢? 唔通入廁所開個大又可以PDA上網寫文?

我做人有時都幾求其，連開呢個扑都係。不過求其唔好咩? 返工就話要求高，依家寫自己野，想點都得啦下話。

個扑點解叫比大屍? 無野格，咪就係是但搵個名囉。之不過英文名Bidazz我真係幾鐘意，咪就係型囉... 呵呵呵

我最初以為扑呢野樣係近呢兩三年既產物，原來追溯最早期既扑客居然係十年前有多，真係估佢唔到。所以你話諗真下，依家有個人正在做緊一D好無聊既野，十幾年後隨時變成潮人必做事件簿十大，仲可能國際知名，所以你都咪話唔好睇小自己D無喱頭習慣。