天水圍．城

如果唔係上網睇新聞見到呢篇報導，我都唔知原來呢首歌講緊天水圍。

我並非克勤的忠實歌迷，但他的歌聽起來不錯，有保證，是樂壇中有料之 人。呢次隻歌攪到咁大，我就立刻上網搵一搵隻碟既資料。原來碟入面都有好多香港既元 素，如時代廣場、香港仔等等。起初我以為「天水．圍城」係講古代中國西北的天水，個名幾文雅古典好似「墨攻」，估唔到原來係咁現代。

網報內容話「元朗區議員周永勤透露，有些社工及官員對歌詞負面描寫天水圍「唔高興 」 」，有市民覺得克勤唱到天水圍樓價跌，我覺得真係冤枉。首歌詞係林夕寫，克勤只係唱，情況有小小似當年有人獻計話要八萬五，但係由特首開口提出一樣。

我陰謀論咁諗，呢個論點都唔知係咪房委會決定要重售天水圍天富苑有關，事關佢重售個呎價比二千年買左同區單位的呎價更平，直頭追貼深圳樓價。眼見依家有隻代罪羔羊可以轉移視線仲唔係度暗自偷笑？

如果持平些小講，用中原指數去睇今日樓價同二千年樓價應該相距不遠，房委會所定的重售價唔知有冇加入樓宇本身、環境及供求等等各種因素入去。我不是樓市專家，但係以銷售方式去睇價格折讓無非是希望更快出貨，以求資金更快回籠。

如果克勤既歌真係有咁大影響力，政府就唔應該淨係搵佢唱基本法咁簡單，唐爺可以搵佢唱預算案，梁大狀又可以搵佢唱好公民黨。睇黎克勤唔做唱作人，隨時能夠變身為政治籌碼兼出口術。

有仔趁嫩生

自從去年結左婚後，以下說話差不多定期會聽到。

「諗住幾時生番個玩下呀？」
「有仔好趁嫩生喇，唔係第時你成頭白髮佢連毛都未出齊！」
「你唔係想你老婆做高齡產婦嘛？」

呢個問題上，我同老婆的諗法一致，覺得完整既家庭生活有下一代係最好。不過大家的出發點有些少唔同。老婆好大程度以生理同心理既角度出發，話年紀越大越危險，而且大家都喜歡小朋友；而我當然係從經濟或者宏觀角度去睇，雖然我唔信養個小朋友要四百粒，不過錢加心力就肯定唔止呢條數，而且屋企夠唔夠住、邊個湊仔及請工人等等都係技術性問題。

老人家經常都話以前一生就生十個八個都得，都養到你地依家肥肥白白，老實講我真係想像唔到果種辛苦法。如果你叫我依家要打三份工做18個鐘養十個八個人，我諗我應該過唔到今年聖誕。

老婆唔係咁諗，佢認為生左出黎先啦，生左就有辦法去養。唔知其他人既老婆係咪個個都係咁諗？定係其實香港太少夫婦想生細路？

我相信現代人對生仔咁顧忌，其中主因就係怕一有細路就會冇左依家既生活水準，即係話你無得一年至少去一次旅行，又冇得放左工就行街shopping，見野就買，更加要花大部份時間為兒女的前途籌算。簡單黎講，就係冇左自己。

呢樣我唔驚，因為知道自己要結婚我就預左冇左自己，一切以老婆行先。不過生仔，係一世投資，我唔知自己能力去到邊。

不過我記得有人同我講「生仔唔係一盤生意或一門投資，你當佢生意咁睇，條數一定冇得賺！你應該當佢係你生命的一部份，無左佢唔得，個諗法就會唔同。」

我... 默然不語

卡通也瘋狂..

今日看AM730的沈旭暉提及Keroro軍曹與當中所含的軍國主義。老實說，這卡通我一次也沒看過。軍曹卡通有其可愛之處，但片中以侵略為故事背景及造型加入所謂日本皇軍的些微特徵，也有足夠令人聯想的理由。誠然，單單就以這點硬說日本軍國主義復辟實有點強詞奪理，不過無可否認，卡通、動畫甚至遊戲對兒童或青年人有越來越大的牽引力。

美國近來生產的「模擬」系列遊戲越來越多，其中較爭議的遊戲如Grand Theft Auto，點解會惹來討論？因為這些遊戲令玩家變成黑社會大佬，甚至冷血槍手等等。而美國校園經常發生的槍擊事件，不少人認為是這類遊戲帶給青年人的思想影響而造成。

老實說，大部份時間卡通或遊戲本身創造出一個幻想或理想空間讓人投入，當中不少與事實有一段距離。最簡單及歷史悠久的例子莫如三國演義。演義裡多個主角如劉備、曹操甚至張飛在演義中的表現實在和「三國誌」中相異之處甚多，如果不讀正典，這些歷史人物就早被定型，再加上如「三國志」電腦遊戲系列的催化更深入民心。

現在香港的卡通或大部份漫畫及遊戲都沒有所謂的PG「家長指引」，兒童接觸到以後如沒有適當的引導，是很容易會照單全收，因此家長有一定責任了解子女接觸到的媒體所發放的訊息，令子女並不一面倒的被一種信息所支配或蒙蔽。但現代家長最缺乏的就是用在兒女身上的時間。

現今青少年對各種媒體的接受能力很高，卻沒有足夠的理性分析孰好孰壞。家長積極的融入子女的生活提供正面訊息，總比每件事都說「不」好一點。