兩個人變成一家人

日前趁老婆得閒，同佢講「我地好耐無睇過戲喎，不如去睇劉華丫？」其實只係我對戰爭片的濃厚興趣挑起左戲癮。

於是出左九龍灣諗住去Broadway，點知懵盛盛去左UA，算啦，都係戲院一間。去到Counter一睇，中後靚位無晒咁滯，不過我淩厲的目光發現後排右邊仲有兩個連位，我心諗點會後排差唔多爆晒而淨係果度有兩個連位，即時問「呢兩個位係咩位」，果位哥仔即時答「係情侶位黎」。

我實在係太耐無去戲院喇，醒唔起係有情侶位呢樣野，我諗個位得一邊有個枕手位唔會兩邊夾住坐得唔舒服，印象中以前坐都好開心下，於是二話不說就俾錢。老婆突然用一對好精靈既眼神望望我話「我地坐情侶位！拍拖牙？」

「你都傻既，唔通唔睇咩。」以前拍拖點同依家，你嫁左喇，唔好咁多幻想。

其實我地以前有無試過睇戲坐情侶位呢？...原來係有既，仲要就係九龍灣UA添，不過睇咩戲就唔記得喇。唔怪得老婆反應咁大。

例牌地去便利店睇下有無咩野好食可以買入場。我習慣一睇戲就斷水斷糧，等我盡量專心睇戲，老婆就次次都要搵野食，我發覺佢志在食多過睇戲。

終於要入場喇，但係當我地去到自己個情侶位時，我地無第一時間坐落去，只係定格望住個位幾秒，老婆之後望一望我，我終於開聲「呢度係一個位定係兩個位？」我地再望望其他位，真係坐兩個人喎。我心諗「今次真係中伏，個位細到同屋企一格梳化差唔多，點捱兩粒幾鐘」。

我地好辛苦坐低左，屁股貼屁股，我膝頭頂到前面個位實一實，都唔知會唔會瘀添。

唔寫戲評了，成套戲都OK好睇。不過要起身鬆人時，兩隻腳好「冤」下，好明顯係血氣唔運行，老婆反而若無其事。

「以後都咪鬼黎呢間度睇戲，貼錢買難受！」

「你睇你個肚腩丫。」

......吼！劉華教我要兼愛非攻。

人吃人的社會

今日大部份報章頭條都係斬賢仔案。不過估唔到生果報用嫖客做頭條，真係抵佢賣紙賣得多，因其將港男利益放在首位。

單案好簡單只係斬人案，不過連個官都話呢單案係少有咁兇殘既案件之一，點解？案入面既人物隨左賢仔祖母同埋個的士佬外，全部人都係十幾廿歲既青年男女，俗語可以話毛都未出齊，但係由策劃到行兇一條龍做齊，你話到底係「愛既反面係恨」呢樣野個層次真係可以去到咁激，定係呢個世界「我得唔到幸福你都咪駛旨意得到」係咁普遍？依家後生仔女真係咁鐘意見血，定係要睇下副棺材先測試到自己識唔識流眼淚？

個官講呢個Point，原因係極少十幾廿歲人個腦諗野會諗到去到要殺人。老實講我真係想像唔到究竟佢個腦既思想模式係點，愛屋及烏我就聽過，估唔到依家係「恨屋及烏」。我記得當年新聞報導鄭大斑俾人斬或者肥仔何俾人打到豬頭，兇徒都無好似呢單兩個十七歲既兇手做得咁義無反顧。我諗佢地唔係以為自己好似野獸刑警既阿譚，斬死大佬就可以上位卦。

我無留意亦都無心機去了解果個女人既背景同埋案發前後，佢寫封信俾賢仔係咪真心悔改我唔知，產後抑鬱到可以諗點去殺人我都唔理解，我只係覺得佢最後悔應該係有段可能係頗長既時間唔可以照顧佢自己個仔。

我好期待個官會點樣判個女仔，不過正義得以彰顯又點，輸得最慘係邊個？正如某報評論話就係右手的疤痕和活動不便、同埋「我阿媽勁過大佬」既兩個小朋友。

天要下雨，娘要嫁人

昨日港股單日跌幅565點，係911之後最大單日跌幅，但係市面卻無乜人有面青青既表情。

咁表示咩野呢？咪就係散戶覺得係必然囉。或者咁講，大戶不斷舞高弄低，等人接受左呢排個市就係忽上忽落，挑起左一眾香港人既賭根，擺低錢同個市場玩大細。當565點都唔夠引起恐慌既時候，個市隨時又會升565點甚至更多，等所有人以為跌幾多都會升番幾多，點解？我地背靠祖國嘛，年年一成幾咁增長，你駛驚個市會跌得去邊？

我記得當初941上市，升到上80蚊既時候，真係神州6號升空咁，無諗過佢升完空係會返黎地球。結果咪就係幾年間跌下跌下試過去到十幾蚊囉。點解我咁記得？俾你睇下我隻手既傷痕。你話依家係咪個市想我地坐神州7號升到去火星？你心底係咪覺得中國前景遠大過幾年超越美國？零八奧運將中國推向世界既最高峰？或者會有咁既一日，不過股市唔係要黎反映呢樣野。

股市只係一個市場，俾人買賣同埋集資而已，同Chapman個節目一樣，「價岩，俾你」。

中資金融股已經試左大家既接受能力有幾大，大部份都跌左半成左右。遲下會唔會再試多幾次？唔駛問阿桂啦。不過我就理都費事理，我諗5號仔會幫我解決呢個問題。

搶了你的錢

好幾日無寫文，因為病左幾日，睇左次醫生。

我好耐冇試過睇醫生，通常一年都係一次起兩次止。今次睇完醫生，發現有件事幾特別，就係以前食藥一定係一日四次每次一粒，但係今次就一日三次每次一粒。一向都係隔四個鐘食藥無啦啦變成六個鐘，姑娘又無解釋，不過作為病人既我當然係醫左個病再講啦。

我心諗唔通依家既藥既藥力勁左，所以唔可以食得咁密，定係醫生有左新既用藥指引，我就不得而知，只係知道話變就變，你只要照跟就得。如果有邊位藥劑師知咩事既，唔該解一解俾我知。

當然，我呢類小病，最緊要醫好左就算啦，而且都係百幾二百蚊。不過我關心既係一日食幾多次藥同醫生收入賺多賺少會唔會拉得上關係。醫生都係打開門口做生 意，你黎睇病我俾藥你食，然而同一種藥由不同藥廠出都有唔同價錢。我地小市民唔會識分藥既平貴，醫生俾就照食，小數目當然無問題，但係如果係長期病患既藥 就真係唔講得笑，差唔多係要定期進貢。

唔想食咁多藥，除左小心身體唔好咁易病之外，就真係要搵信得過既醫生，如果自己係識一兩個既就可以要黎看下門口。

唔好睇做私家醫生一定係好好搵，依家天氣越黎越曖，傷風感冒發病可能比以前少，同埋有咁多成藥又平又正，醫生的收入都會有一定影響，淨係鋪位加租已經係一大負擔。

最近有人投訴話領匯靜靜地對佢地既商場停車場等大幅加租，其實自從領匯上市，所有旗下既租戶應該早就知道會有呢一日既來臨。個個租戶都話無良心又話搶錢又 話打橫黎，總之加租就係罪大惡極。我只可以話依家講乜都無用，只可以問心果句，當日大家有冇係電視機面前話阿盧婆婆阻住地球轉？

我諗最好既對沖就係買番領匯既股票喇！