音樂椅玩完未?

今日股市新一輪新股抽水掀開序幕。建滔積層板(1888)率先登場，收報$8.93，比招股價7.73升$1.2，每手都有幾百蚊賺。由於超額認購啟動回撥，所以今次公開發售多至3億75百萬股，亦因此令每人最少有一手，皆大歡喜。我果一手仲未賣，不過照成交股數睇就應該好多人放左，因為今日有3億95百萬股成交咁多，我認為基金可能係想盡快收貨想令街貨減少再借市旺炒上，原本公開發售得一成貨基金較易得手，依家要花多少少功夫喇。

黎緊仲有中國通訊服務、奧普、招金、錦江、中國交通建設及真明麗等新股，大部份都應該會高倍超購，呢批股趁起鬨一定會大收旺場，但係提防造左個尖頂後迅速回落，到時千祈唔好低吸喇。

近來開始有利淡消息，但係無乜人理會，可能個市真係太旺喇。匯豐發出盈警呢個消息，真係令好多價值投資者反應各異，有人認為再有機會低吸，有人認為匯豐於環球經濟向好的情況下出得盈警，顯示有隱憂。我認為匯豐這次盈警是投資者的一記當頭棒喝，當各地股市異常亢奮之時，其實是危機四伏。匯豐沒有再於新興市場加大投資，轉而鞏固現有歐美市場，是否想說明，投資新興市場風險已頗高，又缺乏好的併購機會提高市場份額？不少分析說油價大升、息口及美國經濟見頂對於比經濟行前6至9個月的股市影響至大，甚有機會作大調整。如此看來，來季美股業績期時要多加留意了。

我見依家市內風高浪急，今日也將手上部份股份減持，包括月內以$8.2買入的中石油，及$13買入的工銀亞洲，仍然持有$3.7買入的中油香港及$3.5買入的工商銀行。現況增持現金比例不失為保守的選擇，無法啦，因為心血少，驚自己玩到爆血管。


**************************************
免責聲名：以上內容關於任何投資市場資訊及意見只是個人經驗分享，並非投資建議。

用腳投票

買股票就好似去街市買菜一樣，當日見到邊樣靚既就買邊樣。好正常丫。部份股民更加只會買佢地認識既股票，例如有用到該間公司既服務或者有生意來往等。例如有人買新鴻基既樓住，覺得無論設計、用料、間隔、價格甚至服務維修等等都非常滿意，於是就會買新鴻基既股票，因為知道「有麝自然香」。

同大家息息相關既上市公司有好多，今次講下食方面。早陣子紅猴股評提及兩家上市食店：大家樂和大快活。

每逢上班日子都要出外午餐，而我最主要光顧的食店主要是大家樂和大快活。我記得六七八九年前，是非常討厭大快活這家食店，主因當然係食物質素比同級的大家樂差一皮唔止，就以我至愛既炸雞脾沙律為例，咁簡單既小食，大快活既出品都明顯地給大家樂比下去。我相信係同整體處理菜單的質素及穩定性有莫大關係。

近來，自大快活搵左Alan Chan，幫整個企業改頭換面之後，大快活真的可謂一洗頹風。入型入格既餐廳設計，食物質素的提升，重點食品宣傳攻勢再加合適代言人，完全發揮十成功力，將以往俾大家樂壓住黎打既局面扭轉。

現在的我比較喜歡去大快活食飯，咖哩飯系列及一般中式套餐也較合我口味；相反覺得大家樂各款飯食並無明顯進步，食物水準參差之餘欠缺賣相，唯一好處是飯量平均比大快活多。

所以一眾市民的味蕾是雪亮的，從兩家食店五年的股價走勢可知一二。

你痴定佢痴

我很介意自己只懂向錢看。

我總相信人與人之間的相處，不一定只有利益掛帥。

不過，香港繁華背後，人心被五光十色的物質蠶食，所剩的只有一副自我的銅臭軀殼。

貧富懸殊的香港裡，你看到這兩個人，會有怎麼樣的感嘆？

你會說「唔做野又學人生仔食綜援，抵死！」？

你會說「貧賤夫妻百事衰，當笑話睇下算」？

你會說「訓街都要博見報，想出位搵水乎」？

你會說「睇死佢會離婚，不過唔知有冇錢攪手續」？

撫心自問，腦袋有否泛起一絲絲的感動，相信他們真心相愛？

人說「歡場無真愛」，我並無研究，到底天橋底下有無真愛。

我信人間有情，不是特首鼓勵市民生三個的口號，也不是流行曲電影劇集的老套橋段。

試試看，剝掉那副有色眼鏡。